4 నిమిషాలు చదవండి 

మనలో చాలామందికి తాము మంచిగా లేమని అనిపించిన క్షణాలు ఉండే ఉంటాయి.

బహుశా మీరు ప్రేమించే వ్యక్తిపై కోపాన్నిపెట్టుకుని ఉండవచ్చు. లేదా మళ్లీ ఎప్పటికీ చేయనని మీకు మీరు ప్రమాణం చేసుకున్న తప్పునే మళ్లీ చేసి ఉండవచ్చు. లేదా “నాలాంటి వ్యక్తిని దేవుడు ఎప్పటికైనా అంగీకరిస్తాడా?” అని నిశ్శబ్దంగా మీలో మీరే ఆశ్చర్యపోయి ఉండవచ్చు.

దేవుడు మనల్ని పూర్తిగా ప్రేమించాలన్నా లేదా సహాయం చేయాలన్నా మనము  మొదట తగినంత మంచిగా మారాలని చాలామంది నమ్ముతారు. మనము  మరింత ప్రార్థిస్తే, మరిన్ని మంచి పనులు చేస్తే లేదా తక్కువ తప్పులు చేస్తే, చివరికి ఆయనకు అర్హులుగా మారుతామని భావిస్తారు.

కానీ సువార్త అంతకంటే ఎంతో ఆశతో నిండిన ఒక విషయాన్ని బోధిస్తుంది.

దేవుడు తన పిల్లలు తమ స్వశక్తితో తన వద్దకు తిరిగి రావాలని ఎప్పుడూ ఆశించలేదు. అందుకే ఆయన తన కుమారుడైన యేసుక్రీస్తును పంపారు.

ఆయన ద్వారా, పరలోక తండ్రి మనకు కృపను—ఆయన దివ్యమైన సహాయం, బలం, కనికరం మరియు శక్తి అనే కానుకలను అందించారు. కృప అనేది పరిపూర్ణమైన వ్యక్తులకు లభించే బహుమతి కాదు. క్రీస్తు వద్దకు రావడానికి సిద్ధంగా ఉన్న ప్రతి వక్తి కోసం ఇచ్చే ప్రేమపూర్వకమైన కానుక అది.

కృప అంటే ఏమిటి?

కృప అనేది యేసుక్రీస్తు యొక్క ప్రాయశ్చిత్తం ద్వారా మనం పొందే దివ్యమైన సహాయం మరియు బలం.

ఆదాము మరియు హవ్వల పతనం వలన, ప్రతి ఒక్కరూ శారీరక మరణాన్ని మరియు దేవుని నుండి ఆధ్యాత్మిక వేర్పాటును అనుభవిస్తారు. మనం కూడా తప్పులు చేస్తాము మరియు ఆయన పరిపూర్ణ ప్రమాణాలను అందుకోవడంలో విఫలమవుతాము.

మనం ఎంత యథార్థంగా ఉన్నా లేదా ఎంత కష్టపడినా, మన స్వశక్తితో పాపాన్ని లేదా మరణాన్ని అధిగమించలేము.

అందుకే యేసుక్రీస్తు ఈ లోకానికి వచ్చారు.

ఆయన పరిపూర్ణమైన జీవితాన్ని గడిపారు, మన పాపాల కోసం శ్రమపడ్డారు, మన కోసం మరణించారు మరియు పునరుత్థానమయ్యారు. ఆయన ప్రాయశ్చిత్తం ద్వారా, మనం క్షమించబడటానికి, మారడానికి కావలసిన బలాన్ని పొందడానికి మరియు ఒక రోజు పరలోక తండ్రితో కలిసి నివసించాలని  తిరిగి వెళ్లడానికి మార్గాన్ని సులువుగా చేశారు.

అపొస్తలుడైన పౌలు ఇలా బోధించారు:

“విశ్వాసము ద్వారా కృప చేతనే మీరు రక్షించబడియున్నారు.” (ఎఫెసీయులకు 2:8)

కృప అనేది ఏదో ఒక రోజు నిత్యజీవాన్ని పొందడం గురించి మాత్రమే కాదు. అది మన జీవితాల్లో ప్రతి ఒక్క రోజు పనిచేసే దేవుని శక్తి.

కృప అనేది ఒక కానుక, మనం సంపాదించుకునేది కాదు

ఒక తండ్రి తన బిడ్డ పాఠశాల ఫీజు మొత్తాన్ని చెల్లిస్తున్నాడని ఊహించుకోండి.

తండ్రికి తిరిగి చెల్లించడానికి ఆ బిడ్డ పాఠశాలకు వెళ్లదు. అది అసాధ్యం.

దానికి బదులుగా, తండ్రి ఇప్పటికే అవకాశాన్ని అందించినందున బిడ్డ చదువుకుంటుంది, నేర్చుకుంటుంది మరియు ఎదుగుతుంది.

కృప కూడా సరిగ్గా అలానే పనిచేస్తుంది.

మనం ఎప్పటికీ చెల్లించలేని క్రయాన్ని యేసుక్రీస్తు ఇప్పటికే చెల్లించారు.

ఆయన ప్రేమను సంపాదించుకోవడానికి లేదా రక్షకునికి తిరిగి చెల్లించడానికి మనం దేవునికి విధేయత చూపము. మనం ఆయనను ప్రేమిస్తున్నాము కాబట్టి, ఆయనను నమ్ముతున్నాము కాబట్టి, మరియు మనం ఆయనకు తెలిసిన వ్యక్తులుగా మారాలని అనుకుంటున్నాము కాబట్టి మనం విధేయత చూపిస్తాము.

కృప అనేది మనం కొనుగోలు చేసేది కాదు. అది మనం కృతజ్ఞతతో స్వీకరించేది మరియు మన జీవితాలను మార్చుకోవడానికి అనుమతించేది.

కృప క్షమించడం కంటే ఎక్కువ చేస్తుంది

ప్రజలు ‘కృప’ అనే మాట విన్నప్పుడు, తరచుగా క్షమాపణ గురించి మాత్రమే ఆలోచిస్తారు.

క్షమాపణ అనేది కృపలో ఒక అందమైన భాగం—కానీ అదే మొత్తం కథ కాదు.

మన శక్తితో మనం కాగలిగిన దానికంటే మెరుగ్గా మారడానికి కూడా కృప మనకు బలాన్నిస్తుంది.

సైకిల్ తొక్కి నేర్చుకుంటున్న ఒక బిడ్డను ఊహించుకోండి.

ఆ బిడ్డ మళ్లీ మళ్లీ కింద పడతారు  ప్రేమామయుడైన తండ్రి లేదా తల్లి మొదటి పతనానికే ప్రయత్నాన్ని వదిలేయరు. దానికి బదులుగా, ఆ బిడ్డ నిలబడటానికి సహాయం చేస్తారు, ప్రోత్సహిస్తారు మరియు నేర్చుకునే వరకు తోడుగా ఉంటారు.

మన పరలోక తండ్రి కూడా మనతో అలాగే ప్రవర్తిస్తారు.

మనం తడబడినప్పుడు, ఆయన మనల్ని వదిలేయరు. యేసుక్రీస్తు ద్వారా, ఆయన మనల్ని లేపుతారు, బలపరుస్తారు మరియు ముందుకు సాగమని మనల్ని ఆహ్వానిస్తారు.

రోజువారీ జీవితానికి కృప బలాన్నిస్తుంది

కృప అనేది కేవలం పాపాన్ని అధిగమించడానికి మాత్రమే కాదు.

అది జీవితంలోని సవాళ్లను ఎదుర్కొనే బలాన్ని కూడా ఇస్తుంది.

అనారోగ్యం, ఆర్థిక ఇబ్బందులు, కుటుంబ సమస్యలు లేదా నిరాశతో కృంగిపోయినప్పుడు బహుశా మీరు ప్రార్థించి ఉండవచ్చు. రక్షకుడు నిశ్శబ్దంగా మనకు శాంతిని, ధైర్యాన్ని మరియు కొనసాగడానికి కావలసిన బలాన్ని ఇచ్చే క్షణాలు తరచుగా అవే.

అపొస్తలుడైన పౌలు ఇలా సాక్ష్యమిచ్చారు:

“నన్ను బలపరచువానియందే నేను సమస్తమును చేయగలను.” (ఫిలిప్పీయులకు 4:13)

పౌలు తన స్వశక్తితో సమస్తమూ చేయగలనని చెప్పలేదని గమనించండి.

మన బలం యేసుక్రీస్తు నుండి వస్తుంది.

కొన్నిసార్లు ఆయన మన పరిస్థితులను మారుస్తారు. మరికొన్నిసార్లు గొప్ప విశ్వాసంతో ఆ పరిస్థితులను ఎదుర్కొనేలా ఆయన మనల్ని మారుస్తారు.

మనం దేవుని కృపను సంపాదించుకోగలమా?

ప్రజలు అడిగే అత్యంత సాధారణ ప్రశ్నలలో ఇది ఒకటి.

సమాధానం చాలా సులువైనది.

లేదు.

కృప అనేది ఒక కానుక.

మోర్మన్ గ్రంథం ఇలా బోధిస్తుంది:

“మనం చేయగలిగినదంతా చేసిన తర్వాత, కృప ద్వారానే మనం రక్షించబడతాము.” (2 నీఫై 25:23)

ఈ గ్రంథ వాక్యం యొక్క అర్థం మనకు సహాయం చేసే ముందు మనం సమస్తమూ చేసే వరకు క్రీస్తు వేచి ఉంటారని కాదు.

మనం ప్రారంభించక ముందే, మనం ప్రయత్నిస్తున్నప్పుడు, మనం విఫలమైనప్పుడు మరియు మనం ఎదుగుతున్నప్పుడు ఆయన కృప మనకు తోడుగా ఉంటుంది.

విశ్వాసం, పశ్చాత్తాపం, బాప్తిస్మం, దేవుని ఆజ్ఞలను పాటించడం మరియు పవిత్రమైన నిబంధనలు చేసుకోవడం అనేవి కృపను సంపాదించుకునే మార్గాలు కావు. అవి యేసుక్రీస్తుకు మరింత దగ్గరవ్వడానికి మరియు ఆయన ఉచితంగా అందించే ఆశీర్వాదాలను పొందడానికి మన హృదయాలను తెరిచే మార్గాలు.

కృప మనం మారే స్వభావాన్ని మారుస్తుంది

యేసుక్రీస్తు మన గతాన్ని క్షమించడం కంటేఎన్నో  ఎక్కువ విషయాలపై ఆసక్తి కలిగి ఉన్నారు.

ఆయన మన భవిష్యత్తును సిద్ధం చేస్తున్నారు.

ఒక మామిడి చెట్టును ఊహించుకోండి.

అది ఒకే రాత్రిలో కాయలను కాయదు. దానికి సమయం, పోషణ మరియు రోజువారీ సంరక్షణ అవసరం.

మన ఆధ్యాత్మిక ఎదుగుదల కూడా అలాగే పనిచేస్తుంది.

మనం యేసుక్రీస్తుపై ఆధారపడినప్పుడు, ఆయన కృప నిమ్మదిగా మన హృదయాలను మారుస్తుంది. మనం మరింత సహనం, క్షమాగుణం, నిజాయితీ, లొంగుబాటు మరియు ప్రేమ కలిగినవారిగా మారతాము.

మోర్మన్ గ్రంథం ఇలా వాగ్దానం చేస్తుంది:

“నా ముందు తమ్మును తాము తగ్గించుకొను మనుష్యులందరికీ నా కృప చాలును.” (ఈథర్ 12:26–27)

మనం ఆయనపై నమ్మకం ఉంచడం కొనసాగించినప్పుడు ఆయన మన బలహీనతలను కూడా బలాలుగా మారవచ్చు.

నిజమైన ఆధ్యాత్మిక మార్పు సాధారణంగా కొద్దికొద్దిగా జరుగుతుంది—ఒకేసారి జరగదు.

మీరు ప్రయత్నాన్ని వదిలేయాలని అనుకున్నప్పుడు

చాలామంది ఒకే రకమైన బలహీనతలతో మళ్లీ మళ్లీ పోరాడుతున్నందున నిరాశకు గురవుతారు.

వారు ఇలా ఆలోచిస్తారు: “బహుశా నేను మంచివాడిని కాదేమో.” “బహుశా నన్ను క్షమించడంలో దేవునికి విసుగు వచ్చిందేమో.” “బహుశా నేను ఎప్పటికీ మారనేమో.”

యేసుక్రీస్తును అనుసరించడం అంటే ఎన్నడూ కింద పడకపోవడం కాదు అని కృప మనకు గుర్తుచేస్తుంది.

దాని అర్థం ప్రయత్నాన్ని ఎన్నడూ వదిలేయకపోవడం.

మన పరలోక తండ్రి సహనశీలుడు.

మనం యథార్థంగా పశ్చాత్తాపపడి ఆయన వైపు తిరిగిన ప్రతిసారీ ఆయన సంతోషిస్తారు.

ఆయన ఒకే రాత్రిలో పరిపూర్ణతను ఆశించరు.

ఆయన కేవలం తన కుమారుని వద్దకు వస్తూనే ఉండమని మనల్ని ఆహ్వానిస్తున్నారు.

యేసుక్రీస్తు నందు నమ్మకంతో జీవించడం

కృప అనేది దేవుని ప్రేమ యొక్క అత్యంత గొప్ప వ్యక్తీకరణలలో ఒకటి.

యేసుక్రీస్తు మనకు సహాయం చేసే ముందు మనం పరిపూర్ణంగా మారే వరకు పోట్టి  ముగింపు రేఖ వద్ద వేచి ఉండడు.

ఆయన ఈ ప్రయాణంలోని ప్రతి అడుగులో మన పక్కనే నడుస్తారు.

మనం పశ్చాత్తాపపడినప్పుడు ఆయన మనల్ని క్షమిస్తారు.

మనం బలహీనంగా ఉన్నప్పుడు ఆయన మనల్ని బలపరుస్తారు.

మనం ఆయనపై నమ్మకం ఉంచడం కొనసాగించినప్పుడు ఆయన మనల్ని మారుస్తారు.

మళ్లీ క్రొత్తగా ప్రారంభించే ప్రతి అవకాశం, మనం పొందే ప్రతి ఆశీర్వాదం, ప్రశాంతత లభించే ప్రతి క్షణం మరియు నిత్యజీవం యొక్క వాగ్దానం యేసుక్రీస్తు వలనే సాధ్యమవుతాయి.

కృప అనేది మనం విఫలమైనప్పుడు దేవుడు చూపించే దయ కంటే ఎంతో మిన్నయైనది.

అది ప్రతిరోజూ మన జీవితాల్లో పనిచేసే ఆయన దివ్యమైన శక్తి—మన పరలోక తండ్రి మనం ఏ విధంగా మారగలమని భావిస్తున్నారో ఆ విధంగా మారడానికి సహాయపడే శక్తి.

మీకు ఇవి కూడా ఆసక్తికరంగా ఉండవచ్చు:

సంబంధించిన వీడియో