దారి కష్టంగా మారినప్పుడు మీరు ముందుకు సాగుతారా?

జీవితం ఎల్లప్పుడూ మనం అనుకున్నట్లే సాగదు.

ముందున్న దారి అనిశ్చితంగా అనిపించినప్పుడు , ప్రార్థనలకు సమాధానం దొరకని మరియు సవాళ్లు మోయలేనంత బరువుగా అనిపించే క్షణాలు ఉంటాయి. అలాంటి సమయాల్లో, ముందుకు సాగడానికి అవసరమైన శక్తి ఎక్కడ దొరుకుతుందా అని సందేహించడం సహజం.

లాటర్-డే సెయింట్ పయినీర్ల కథ మనకు ఒక విషయాన్ని గుర్తు చేస్తుంది: విశ్వాసం అంటే కష్టాలు లేకపోవడం కాదు. కష్టాలు ఉన్నప్పటికీ దేవుడిని నమ్ముతూ, అడుగులో అడుగు వేస్తూ ముందుకు సాగడమే నిజమైన విశ్వాసం.

విశ్వాసంతో కూడిన ఒక ప్రయాణం

దాదాపు రెండు వందల సంవత్సరాల క్రితం, వేలాది మంది లాటర్-డే సెయింట్ పయినీర్లు తాము ఎంతో ఇష్టంగా నిర్మించుకున్న ఇళ్లను వదిలిపెట్టి, తమకు నచ్చినట్లు దేవుడిని ఆరాధించే స్వేచ్ఛ కోసం పశ్చిమ దిశగా ప్రయాణమయ్యారు.

ఆ ప్రయాణం ఎంతమాత్రం సులువుగా సాగలేదు. కుటుంబాలు నదులను దాటాయి, వందల మైళ్ల దూరం కాలినడకన నడిచాయి, మరియు ఆకలి, అనారోగ్యం, విపరీతమైన వాతావరణ పరిస్థితులను తట్టుకుని నిలబడ్డాయి. అయినప్పటికీ, ప్రభువు తమను నడిపిస్తున్నాడనే బలమైన నమ్మకంతో వారు ముందుకు సాగారు.

మొదటి పయినీర్లు జూలై 1847 లో ‘సాల్ట్ లేక్ లోయ’ లోకి ప్రవేశించినప్పుడు, అధ్యక్షుడు బ్రిగమ్ యంగ్ ఆ లోయ వైపు చూసి “ఇదే సరైన స్థలం” అని ప్రకటించారు. అలసిపోయిన ఆ విశ్వాసులకు, దేవుడు తమ ప్రయాణంలో ప్రతి అడుగులోనూ తోడుగా ఉన్నాడనే విషయానికి ఆ మాటలు ఒక గొప్ప నిదర్శనంగా నిలిచాయి.

ప్రతి శోధనలోనూ ప్రభువును నమ్మడం

విశ్వాసం అంటే కేవలం నమ్మడం మాత్రమే కాదు ఆ నమ్మకాన్ని క్రియలలో చూపించడం అని పయినీర్లు అర్థం చేసుకున్నారు.

తమ ప్రయాణం ఎక్కడ ముగుస్తుందో తెలియకపోయినా, వారు ఆశతో ముందుకు సాగారు.

నేటి కాలంలోని తన శిష్యులకు కూడా ప్రభువు అలాంటి వాగ్దానమే ఇస్తున్నారు:

“మీరు సిద్ధపడి ఉంటే, మీరు భయపడరు.” (సిద్ధాంతము మరియు నిబంధనలు 38:30)

ఆ పయినీర్ల ప్రయాణానికి గొప్ప సిద్ధపాటు వారు తమ వెంట తెచ్చుకున్న సామాగ్రి మాత్రమే కాదు, తమ హృదయాలలో వారు మోసుకువచ్చిన విశ్వాసమే!

వారు మనకు అందించి వెళ్లిన వారసత్వం

ఆ పయినీర్లు ఇళ్లను కట్టుకున్నారు, పంటలు పండించారు మరియు సమాజాలను స్థాపించారు. కానీ, వారు మనకు అందించి వెళ్ళినది అన్నిటికంటే గొప్పది అదే వారసత్వం యేసుక్రీస్తుపై వారికకున్న అచంచలమైన సాక్ష్యమే.

ఈ విషయంపై అధ్యక్షుడు థామస్ ఎస్. మాన్సన్ ఒకప్పుడు ఇలా అన్నారు:

“మన పయినీర్లు విశ్వాసం, దూరదృష్టి, ధైర్యం, త్యాగం మరియు పట్టుదల కలిగిన వ్యక్తులు. వారు ఎల్లప్పుడూ ముందుకు చూశారు కానీ, వెనక్కి తిరిగి చూడలేదు.”

ప్రతి తరానికి అధిగమించాల్సిన సవాళ్లు ఉంటాయని వారి జీవితం మనకు గుర్తు చేస్తుంది. ఈ రోజు మనకు వచ్చే కష్టాలు వేరుగా ఉండవచ్చు, కానీ మన శక్తికి మూలం మాత్రం ఒక్కటే.

ఒక అద్భుతమైన ఉదాహరణ: మేరీ ఫీల్డింగ్ స్మిత్

మేరీ ఫీల్డింగ్ స్మిత్ భర్త హైరమ్ స్మిత్ అమరవీరుడిగా మరణించిన తర్వాత, మేరీ తన పిల్లల బాధ్యతలను మోస్తూ ఒక అనిశ్చితమైన భవిష్యత్తును ఎదుర్కోవాల్సి వచ్చింది. అయినప్పటికీ, ఆమె భయానికి లొంగక విశ్వాసాన్ని ఎంచుకుని, పశ్చిమానికి వెళ్తున్న విశ్వాసుల బృందంతో కలిసి ప్రయాణమయ్యారు.

ఆ ప్రయాణం ఆమెను అన్ని విధాలా పరీక్షించింది. ఆమె అనారోగ్యాన్ని, ప్రతికూల వాతావరణాన్ని మరియు పరిమిత వనరులతో తన కుటుంబాన్ని చూసుకోవడానికి రోజువారీ పోరాటాన్ని ఎదుర్కొంది. ఒకానొక సమయంలో, ఆమె ఎద్దులు బలహీనపడ్డాయి, దీనితో ఆమె ప్రయాణాన్ని కొనసాగించలేదని చాలామంది భావించారు. కానీ మేరీ ధైర్యం కోల్పోవడానికి నిరాకరించింది. ఆమె ప్రభువును నమ్మింది, కష్టపడి పనిచేసింది మరియు ఒక్కో అడుగు ముందుకు వేసింది.

ఆమె విశ్వాసం మరియు పట్టుదల ద్వారా, ప్రభువు ఆమె కుటుంబాన్ని బలపరిచారు మరియు వారు సురక్షితంగా ‘సాల్ట్ లేక్ లోయ’ కు చేరుకోవడానికి సహాయం చేశారు. మేరీ కథ మనకు గుర్తు చేసేదేమిటంటే, విశ్వాసం అనేది మన కష్టాలను ఎల్లప్పుడూ తొలగించకపోవచ్చు, కానీ అది ముందుకు సాగడానికి అవసరమైన ధైర్యాన్ని మరియు శక్తిని ఇస్తుంది. పయినీర్లలాగే, ప్రభువు మనకు ఎలా సహాయం చేస్తారో మనకు తెలియకపోవచ్చు, కానీ ప్రయాణంలోని ప్రతి అడుగులో ఆయన మనకు తోడుగా ఉంటాడని మనం నమ్మవచ్చు.

దీని వల్ల మనం ఏం నేర్చుకోవాలి?

ఈ రోజు మనలో చాలా మంది మైదానాలలో చేతి బండ్లను లాగాల్సిన అవసరం లేదు.

కానీ మన కుటుంబాలను చూసుకోవడంలో, వ్యక్తిగత సమస్యలను అధిగమించడంలో, కష్టమైన నిర్ణయాలు తీసుకోవడంలో లేదా అనిశ్చిత సమయాల్లో విశ్వాసంగా నిలబడటంలో ముందుకు సాగడానికి మనందరికీ ధైర్యం కావాలి.

ఆ పయినీర్ల లాగే, మన ప్రయాణంలోని ప్రతి అడుగు మనకు ముందే తెలియాల్సిన అవసరం లేదు. మనల్ని నడిపించే దేవుడిని మనం నమ్మితే చాలు.

మనం యేసుక్రీస్తుపై ఆధారపడినప్పుడు, నేటి సవాళ్లను నిరీక్షణతో, ధైర్యంతో ఎదుర్కొనే శక్తిని ఆయన మనకు ఇస్తారు.

విశ్వాసంతో ముందుకు నడుద్దాం

పయినీర్ల ప్రయాణం అనేది కేవలం గతానికి సంబంధించిన ఒక స్ఫూర్తిదాయకమైన కథ మాత్రమే కాదు.

దేవుడు తన వాగ్దానాలను నిలబెట్టుకుంటారని మరియు తనను నమ్మే వారిని బలపరుస్తారనే విషయానికి అది ఒక జీవమున్న సాక్ష్యం.

ఇకపై ఎప్పుడైనా మీ జీవితంలో దారి కష్టంగా అనిపించినప్పుడు, ఆ పయినీర్లను గుర్తు చేసుకోండి. వారి ప్రయాణం విశ్వాసంతో ప్రారంభమైందని, త్యాగంతో కొనసాగిందని మరియు నిరీక్షణతో ముగిసిందని.

అప్పుడు వారిని నడిపించిన రక్షకుడే, ఈ రోజు మనల్ని కూడా నడిపిస్తున్నారు— నమ్మకంతో ముందుకు సాగండి

మూలం: చర్చి హిస్టరీ

మీకు ఇవి కూడా ఆసక్తికరంగా ఉండవచ్చు:

• “నేటి నారీగా నేను మారడానికి నా జీవితంలో జరిగిన ప్రతి సంఘటనే కారణం”
• మీరు మొదటిసారి యేసుక్రీస్తు కడవరి దిన పరిశుద్ధుల సంఘానికి వెళుతున్నట్లయితే తెలుసుకోవలసిన ఐదు విషయాలు
• అబద్ధ ప్రవక్తలను మరియు అపొస్తలులను గుర్తించడం ఎలా?
  

సంబంధించిన వీడియో