పశ్చాత్తాపం
3 నిమిషాలు చదవండి
మనలో చాలామందినికి అనిపించే ఒక నిజాయితీ గల ప్రశ్న ఏమిటంటే: “నేను మంచిగా జీవించడానికి ప్రయత్నిస్తున్నప్పుడు, నేను ప్రతిరోజూ ఎందుకు పశ్చాత్తాపపడాలి?” మనకు తరచుగా “పశ్చాత్తాపం” అనే పదం వినడానికి చాలా కఠినంగా అనిపిస్తుంది. ఏదో “తీవ్రమైన” పాపాలు చేసిన వారికి మాత్రమే ఇది అవసరమేమో అన్నట్లుగా అనిపిస్తుంది. కానీ వాస్తవానికి, రోజువారీ పశ్చాత్తాపం అనేది అపరాధభావం లేదా దోషిగా భావించడం గురించి కాదు, అది మనం సాధించే పురోగతి గురించి.
పశ్చాత్తాపం అనేది కొన్ని దశల జాబితా కాదు, అది ఒక జీవన విధానం.
నిజమైన పశ్చాత్తాపం అంటే కేవలం “నేను తప్పు చేశాను” అని చెప్పి వదిలేయడం కాదు. అది ఒక భిన్నమైన ఆలోచనా విధానం మరియు అనుభూతి. అధ్యక్షుడు ఎజ్రా టాఫ్ట్ బెన్సన్ బోధించారు పశ్చాత్తాపం అంటే మనస్సు మరియు హృదయంలో కలిగే మార్పు. అది ఎంత చిన్నదైనా సరే, మనం ఇంకా ఏదో మెరుగుపరుచుకోవచ్చని గుర్తించడం మరియు దేవునికి మరింత దగ్గరవ్వాలని నిర్ణయించుకోవడం.
అందువల్ల, పశ్చాత్తాపం అనేది మీరు ఏదైనా తప్పుగా ప్రవర్తించినప్పుడు ఒక్కసారి చేసే పని కాదు, అది ఒక నిరంతర సాధన. మనం ఎప్పుడూ ఇంకా కొంచెం ఎదగగలమని గుర్తించే ఒక జీవన విధానం ఇది.
ఒకవేళ నాకు అంత “చెడ్డగా ” అనిపించకపోతే ఏమిటి?
ప్రతి విషయంలోనూ మీకు ఎల్లప్పుడూ లోతైన పశ్చాత్తాపం లేదా బాధ కలగకపోవచ్చు. కొన్నిసార్లు విషయాలను మరింత స్పష్టంగా చూడటం మరియు ఏదో ఒక విషయం మీకు ఆధ్యాత్మికంగా సహాయపడటం లేదని గ్రహించడం మాత్రమే అవసరం కావచ్చు.మనము జాగ్రత్తగా ఉండాల్సింది ఏమిటంటే, దేవుని ఆత్మ వల్ల వచ్చే దుఃఖాన్ని మనల్ని ముందుకు కదలకుండా చేసే అపరాధ భావంతో కలిపి చూడకూడదు.
ఒకవేళ ఆ అసౌకర్యం మిమ్మల్ని మెరుగుపడటానికి మరియు ప్రభువును వెతకడానికి ప్రేరేపిస్తే, మీరు సరైన మార్గంలో ఉన్నారని అర్థం. అలా కాకుండా, అది మిమ్మల్ని పనికిరాని వారని లేదా మీరు మారలేరని అనిపించేలా చేస్తే, అప్పుడు ఇది గుర్తుంచుకోండి: ప్రభువు మిమ్మల్ని నిందించడు, ఆయన మిమ్మల్ని ఆహ్వానిస్తాడు. ఆయన కరుణ ఎల్లప్పుడూ అందుబాటులో ఉంటుంది.
రోజు పశ్చాత్తాపం ఆచరణలో పడితే ఎలా ఉంటుంది?
మన ఆలోచనలను క్రమబద్ధీకరించడానికి కొన్ని దశలు సహాయపడినప్పటికీ (తప్పును గుర్తించడం, విచారించడం, ఒప్పుకోవడం, సరిదిద్దుకోవడం, పరిహారం మరియు పాపాన్ని విడిచిపెట్టడం వంటివి), రోజు పశ్చాత్తాపం అనేది మరీ అధికారికంగా లేదా కఠినంగా ఉండాల్సిన అవసరం లేదు. ఇది మరింత సహజంగా మరియు వ్యక్తిగతంగా ఉంటుంది. ఉదాహరణకు:
- మీరు ఎప్పుడు ఓపికగా ప్రవర్తించలేదో గుర్తించడం.
- ఎవరినైనా అన్యాయంగా విమర్శించినందుకు లేదా తీర్పు తీర్చినందుకు క్షమాపణ అడగడం.
- మనస్ఫూర్తిగా ప్రార్థిస్తూ, “ప్రభువా, నిన్నటి కంటే ఈరోజు నేను ఇంకా మెరుగ్గా ఉండటానికి నాకు సహాయం చేయండి ” అని అడగడం.ఇలాంటి చిన్న చిన్న సర్దుబాట్లు మన జీవితంలో పెద్ద మార్పును తెస్తాయి.
పశ్చాత్తాపం గురించి ఉన్న అపోహలు (ఇప్పుడు మనం వదిలివేయగలవి)
- “నేను కేవలం పెద్ద పాపాలు చేసినప్పుడే పశ్చాత్తాపపడాలి”: ఇది నిజం కాదు. పశ్చాత్తాపం అనేది ప్రతి ఒక్కరికీ, ప్రతి సమయంలోనూ అవసరం. కొన్నిసార్లు ఇది ఏదో “చెడు” చేసినందుకు మాత్రమే కాదు, మనం ఇంకా మెరుగ్గా చేయగలిగే పనుల కోసం కూడా.
- “నేను పశ్చాత్తాపపడటానికి ముందు దాదాపు పరిపూర్ణుడిగా ఉండాలి”: ఇది దానికి పూర్తిగా విరుద్ధం. మనం పరిపూర్ణులం కాదు కాబట్టే పశ్చాత్తాపపడతాము. దీనికి ఎటువంటి ముందస్తు షరతులు లేవు. కేవలం వినయం ఉంటే చాలు.
- “నేను ఒకే తప్పును ఒకటి కంటే ఎక్కువసార్లు చేస్తే దేవుడు విసిగిపోతాడు”: ఇది అబద్ధం. మీరు నిజాయితీగా ప్రయత్నిస్తూనే ఉంటే, దేవుడు మిమ్మల్ని క్షమిస్తూనే ఉంటాడు. ఆయన మన పోరాటాలను తెలుసుకుంటాడు మరియు మనల్ని ఎప్పుడూ విడిచిపెట్టడు. మోషైయ 26:30 ఈ విషయాన్ని చాలా స్పష్టంగా చెబుతోంది.
అయితే నేను ప్రతిరోజూ ఎందుకు పశ్చాత్తాపపడాలి?
ఎందుకంటే అది మనల్ని దేవునితో మరింత దగ్గెరవుతున్నట్లు అనిపించేలా చేస్తుంది. పశ్చాత్తాపం అనేది బలహీనతకు సంకేతం కాదు; అది మనం ఇంకా ఎదగాలని కోరుకుంటున్నాము అనడానికి సంకేతం. ఇది మనల్ని మనం విశ్లేషించుకోవడం, మెరుగుపరుచుకోవడం మరియు ఒకవేళ దారి తప్పితే మళ్ళీ సరైన మార్గంలోకి రావడం గురించి.
మరియు అన్నిటికంటే గొప్ప విషయం ఏమిటంటే: దేవుడు క్షమించినప్పుడు, ఆయన ఎటువంటి పగను లేదా ద్వేషాన్ని ఉంచుకోడు. మనం మనస్ఫూర్తిగా పశ్చాత్తాపపడితే, ఆయన మన తప్పులను ఇకపై గుర్తుంచుకోనని వాగ్దానం చేశాడు (సిద్ధాంతము మరియు నిబంధనలు 58:42–43). అది మనల్ని అపరాధభావం లేకుండా, నమ్మకంతో మరియు ఆశతో ముందుకు సాగేలా చేస్తుంది.
ముగింపు
ప్రతిరోజూ పశ్చాత్తాపపడటం అంటే దోషిగా బతకడం కాదు, కానీ ఒక ఉద్దేశ్యంతో. అంటే మనకు ఇంకా నేర్చుకోవాల్సిన విషయాలు ఉన్నాయని, మార్చుకోవాల్సిన అలవాట్లు ఉన్నాయని మరియు శుద్ధి చేసుకోవాల్సిన హృదయాలు ఉన్నాయని గుర్తించడం. రక్షకుని కృపను మన రోజువారీ ప్రేరణగా ఉపయోగించుకుని మెరుగుపడటమే దీని అర్థం.
మరి మీరు? దేవునికి దగ్గరవ్వడానికి ఈరోజు మీరు ఏమి సర్దుబాటు చేయగలరు?
సంబందించిన ఆధారం: